सांगोला :
आंध्र प्रदेशातील धर्मावरम फर्स्ट टाऊन पोलीस ठाण्याकडील चोरीच्या गुन्ह्यातील संशयित आरोपीच्या मुसक्या आवळून त्याच्याकडून तब्बल २५ तोळे (२४५.६५ ग्रॅम वजनाच्या) सोन्याच्या लगड हस्तगत करुन या आरोपीला आंध्र प्रदेश राज्यातील पोलीसांकडे पुढील तपासकामी ताब्यात देण्यात सांगोला पोलीसांना यश मिळाल्याने सांगोला पोलीसांचे सर्व स्तरातून कौतुक केले जात आहे.
याबाबत सविस्तर हकिकत अशी की,आंध्र प्रदेश राज्यातील धर्मावरम फर्स्ट टाऊन पोलीस ठाण्याकडील पोलीस हवालदार नागांजनेलु हे पोलीस पथकासह सांगोला पोलीस ठाणे येथे येवून धर्मावरम पोलीस ठाणे गु.र.नं. १७/२०२५ बी.एन.एस.२०२३ चे कलम ३१८ (४),३१६ (४) प्रमाणे दाखल गुन्हयातील पाहिजे व संशयित आरोपी याचा शोध घेणेकामी सांगोला पोलीस ठाण्याचे पोलीस निरीक्षक भीमराव खणदाळे यांचे समक्ष हजर झाले.त्यांनी लेखी पत्र देवून पोलीस मदत मिळणेकामी विनंती केली.
त्यानुसार,पोलिस निरीक्षक भीमराव खणदाळे यांचे मार्गदर्शनाखाली सांगोला पोलीस ठाणेकडील सहाय्यक पोलीस निरीक्षक सचिन जगताप,पोलीस हवालदार वजाळे,पो.हवालदार क्षीरसागर,पोलीस कॉन्स्टेबल पांढरे यांचे तपास पथक तयार करुन मदत कामी आंध्र प्रदेश पोलीसांसोबत रवाना करण्यात आले.सांगोला पोलीस ठाणेकडील तपास पथकांकडून संशयित आरोपी ईसमाचा तांत्रिक पध्दतीने तसेच कसोशीने शोध घेत असता,त्यांना गोपनीय बातमीदारामार्फत संशयित ईसम हा सांगोला एस.टी. स्टॅण्ड व आजुबाजूचे परीसरात दिसून आल्याची माहीती मिळाली.
सदर माहिती मिळताच,हे तपास पथक वरील ठिकाणी जावून त्यास शोधून हटकले असता,तो पळून जाण्याचा प्रयत्न करु लागल्याने त्याला पोलीसी हिसका दाखवत ताब्यात घेवून दोन पंचासमक्ष अंगझडती घेतली असता,त्याचेकडे एकूण २४५.६५ ग्रॅम वजनाच्या सोन्याच्या लगड मिळून आल्या. स.पो.नि.सचिन जगताप यांनी आरोपीकडून सदर मुद्देमाल तपासकामी तात्काळ जप्त करुन संशयित ईसम व मिळून आलेले सोने हे आंध्र प्रदेश राज्यातील पोलीसांकडे पुढील तपासकामी ताब्यात दिले.
——————————————————————————
कामगिरी बजावणारे पोलीस अधिकारी व कर्मचारी :
सोलापूर जिल्हा ग्रामीणचे पोलीस अधीक्षक अतुल कुलकर्णी,अपर पोलीस अधीक्षक प्रितम यावलकर, मंगळवेढा विभागाचे उपविभागीय पोलीस अधिकारी विक्रांत गायकवाड यांचे मार्गदर्शनाखाली सांगोला पोलीस ठाण्याचे पोलीस निरीक्षक भीमराय खणदाळे, स.पो.नि.सचिन जगताप, पोलीस हवालदार वजाळे, पोलीस हवालदार क्षीरसागर, पो.कॉ.पांढरे यांनी सदरची उत्कृष्ट व उत्तम कामगिरी पार पाडली.
