सांगोला :
सांगोला विधानसभा निवडणुकीतील महाविकास आघाडीचे उमेदवार माजी आमदार दीपकआबा साळुंखे-पाटील यांनी पुन्हा स्वगृही म्हणजेच राष्ट्रवादी काँग्रेसमध्ये परत जावे,यासाठी आता दीपकआबाप्रेमी कार्यकर्त्यांनीच आग्रह धरला असून महाविकास आघाडीचे उमेदवार असतानाही आघाडीमधील घटक पक्षांनी आपली फसवणूक केल्यामुळेच निवडणुकीत आपला पराभव झाल्याने आघाडीच्या शिवसेना उबाठा पक्षात न थांबता राष्ट्रवादी काँग्रेसमध्ये पुन्हा सक्रिय व्हावे,अशी आग्रही मागणी जोर धरु लागल्याने आता,माजी आमदार दीपकआबा हे पुन्हा राष्ट्रवादी काॅंग्रेसच्या वाटेवर जात असल्याची चर्चा सर्वत्र ऐकावयास मिळत आहे.
पराभवाचे चिंतन करण्यासाठी सांगोला येथे आयोजित करण्यात आलेल्या बैठकीत मतदारसंघातील हजारो कार्यकर्त्यांनी दीपकआबा साळुंखे-पाटील यांनी राज्याचे उपमुख्यमंत्री अजितदादा पवार यांच्या नेतृत्वाखाली पुन्हा एकदा राष्ट्रवादी काँग्रेसमध्ये प्रवेश करुन सक्रिय व्हावे,असा आग्रह धरला.या बैठकीत तानाजीकाका पाटील,आर.डी.पवार,डाॅ.पियुष साळुंखे-पाटील,माजी नगरसेवक शिवाजी बनकर, शिवाजी कोळेकर,डाॅ.राज मिसाळ,संभाजी हरिहर, अजित देवकते,नितीन रणदिवे,विजय इंगवले,भारत नागणे,रफिक काझी,प्रा.अनिल नवत्रे आदींसह प्रमुख कार्यकर्त्यांनी आपले मनोगत व्यक्त करताना माजी आमदार दीपकआबांनी आपल्याला फसवणाऱ्या महाविकास आघाडीतून बाहेर पडावे,असा आग्रह धरला.या चिंतन बैठकीत दीपकआबांनीही कार्यकर्त्यांच्या भावनांचा व भूमिकेचा आदर करुनच पुढील राजकीय भूमिका ठरविणार असल्याचे सांगितल्याने दीपकआबा पुन्हा स्वगृही परतणार असल्याचे या बैठकीतून संकेत मिळाले आहेत.
——————————————————————————
अजितदादांचे नेतृत्व स्वीकारा :
राज्यात ज्या पध्दतीने उपमुख्यमंत्री अजितदादा पवार हे प्रचंड कामाचा माणूस म्हणून ओळखले जातात, त्याच पध्दतीने सांगोला तालुक्यासह सोलापूर जिल्ह्यात माजी आमदार दीपकआबा साळुंखे-पाटील हे प्रचंड कामाचा माणूस म्हणून ओळखले जातात.म्हणून सांगोला तालुक्यातील सर्वसामान्य जनतेच्या भावनेचा आदर करुन आणि सर्वसामान्य जनतेची कामे मार्गी लावण्यासाठी दीपकआबांनी अजितदादांचे नेतृत्व स्वीकारुन पुन्हा एकदा अजितदादांच्या नेतृत्वाखाली स्वगृही परत जावे. – डॉ.राज मिसाळ
