न.पा.निवडणुकीबाबत जेष्ठ सहकारी व कार्यकर्त्यांशी चर्चा करुनच युती किंवा आघाडीबाबतचा निर्णय घेणार – दीपकआबा साळुंखे-पाटील

सांगोला :

वर्षानुवर्षांपासून सोबत काम करणारे सांगोला शहर व परिसरातील ज्येष्ठ सहकारी तसेच नगरपालिकेची निवडणूक लढविण्यासाठी ईच्छुक असलेले उमेदवार व महत्त्वाच्या कार्यकर्त्यांशी चर्चा आणि विचार विनिमय करुनच नंतर नगरपालिका निवडणुकीबाबत पुढील दिशा ठरवून युती किंवा आघाडी करण्याबाबतचा निर्णय घेणार असल्याची माहिती माजी आमदार दीपकआबा साळुंखे-पाटील यांनी दिली.

सांगोला शहरात पूर्वीपासूनच दीपकआबा गटाचे वर्चस्व असून सांगोला नगरपरिषदेच्या मागील निवडणुकीवेळी त्यांच्या विचारांचे सर्वाधिक नगरसेवक निवडून आले होते.सांगोला शहरातील सर्वात मोठा गट म्हणून आबांच्या गटाला यश मिळाले होते.त्यामुळे,युती किंवा आघाडीबाबत दीपकआबा हे कोणती भूमिका घेतात ? यावरच नगरपालिका निवडणुकीची समीकरणे ठरण्याची शक्यता नाकारता येत नाही.

गेली ३५ वर्षे राजकारण करत असताना नेहमीच जिवाभावाचे सहकारी व कार्यकर्ता केंद्रबिंदू मानून आपण काम केले आहे. ज्येष्ठ सहकाऱ्यांचा सल्ला घेऊन तसेच कार्यकर्त्यांना विश्वासात व विचारात घेऊनच प्रत्येकवेळी आपण आपली भूमिका ठरवली आहे.त्यामुळे, उद्याच्या न.पा.निवडणुकीतही सांगोला शहर व परिसरातील प्रभागनिहाय ईच्छुक उमेदवार आणि कार्यकर्त्यांची बैठक घेऊन त्यांच्याशी चर्चा करु आणि कार्यकर्त्यांच्या विचारांशी बांधील राहूनच योग्य तो निर्णय घेवू.तसेच त्यांच्या भावनेचा आदर करुनच सांगोला नगरपालिका निवडणुकीत कोणत्या पक्षासोबत व नेत्यासोबत युती किंवा आघाडी करायची ? याचा निर्णय घेऊ,असे माजी आमदार दीपकआबा साळुंखे-पाटील यांनी यावेळी सांगीतले.
——————————————————————————