सांगोला :
लोकसभा निवडणुकीच्या अनुषंगाने राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांत दादा पाटील यांनी आपल्या प्रचार दौर्‍यादरम्यान सांगोल्याचे आमदार शहाजीबापू पाटील यांची भेट घेऊन त्यांचेसोबत निवडणुकीसंदर्भात चर्चा केली आणि भाजपचे उमेदवार रणजितसिंह निंबाळकर यांना मोठ्या मताधिक्याने विजयी करण्याचे आवाहन त्यांनी यावेळी शिवसेनेच्या कार्यकर्त्यांना मार्गदर्शन करताना केले.
राज्यात माढा लोकसभा मतदारसंघ हा सर्वात जास्त चर्चेत असून या मतदारसंघातील निवडणुकीकडे राज्याचे लक्ष लागले आहे.या मतदार संघातून भाजपने पुन्हा एकदा खासदार रणजितसिंह निंबाळकर यांना उमेदवारी जाहीर केली आहे. निवडणुकीच्या पार्श्वभूमीवर राज्याचे उच्च व तंत्रशिक्षण मंत्री चंद्रकांतदादा पाटील हे सांगोल्यात आले होते.यावेळी त्यांनी सांगोल्याचे आमदार शहाजीबापू पाटील यांच्या संपर्क कार्यालयास भेट देऊन त्यांचेशी निवडणुकी संदर्भात चर्चा केली.
यावेळी बोलताना ना.चंद्रकांतदादा पाटील पुढे म्हणाले की,प्रत्येक बूथ सक्षम करून केंद्र आणि राज्य सरकारने राबविलेल्या योजनांची मतदारांना माहिती द्यावी.सर्वांनी एकदिलाने काम करून खासदार रणजितसिंह निंबाळकर यांना विजयी करण्यासाठी मोठ्या ताकदीने कामाला लागावे,असे आवाहनही केले.
यावेळी भाजपचे उमेदवार रणजितसिंह निंबाळकर, आमदार शहाजीबापू पाटील,माजी आमदार प्रशांत परिचारक, शिवसेना नेते भाऊसाहेब रुपनर,भाजपचे जिल्हाध्यक्ष चेतनसिंह केदार-सावंत,युवासेनेचे जिल्हा संपर्क प्रमुख सागर पाटील,शिवसेना तालुका प्रमुख दादासाहेब लवटे, युवासेना तालुका प्रमुख गुंडादादा खटकाळे,शिवसेना जिल्हाउपप्रमुख जगदीश पाटील, जेष्ठ नेते संभाजी आलदर,भाजपचे मंडल अध्यक्ष अतुल पवार,दुर्योधन हिप्परकर,सुभाष इंगोले,समीर पाटील,प्रा.संजय देशमुख,अँड.गजानन भाकरे यांच्यासह शिवसेनेचे पदाधिकारी व कार्यकर्ते मोठ्या संख्येने उपस्थित होते.
—————————————————————————
रणजितसिंह निंबाळकर यांच्या विजयासाठी प्रयत्न करावेत :
नरेंद्र मोदींना पुन्हा एकदा पंतप्रधान करण्याचे ध्येय उराशी बाळगून रात्रंदिवस कष्ट करत खासदार रणजितसिंह निंबाळकर यांना भरघोस मतांनी निवडून द्यायचे आहे. प्रत्येक नुकसानग्रस्त शेतकऱ्यांना दुष्काळी मदतनिधी देण्याचे वचन देतो.कार्यकर्त्यांनी जोमाने कामाला लागून खासदार रणजितसिंह निंबाळकर यांच्या विजयासाठी प्रयत्न करावेत.
– आमदार शहाजीबापू पाटील
——————————————————————————
