जि.प.व पं.स.निवडणूकीसाठी सांगोल्यात मतदान यंत्रणा सज्ज – निवडणूक निर्णय अधिकारी बी.आर.माळी

सांगोला :

सांगोला तालुक्यातील जिल्हा परिषद व पंचायत समितीची निवडणूक प्रक्रिया ही पारदर्शक, शांततापूर्ण व नियमानुसार पार पडावी,यासाठी मतदान यंत्रणा पूर्णपणे सज्ज झाली असल्याची माहिती मंगळवेढा उपविभागाचे प्रांताधिकारी तथा निवडणूक निर्णय अधिकारी बी.आर.माळी यांनी दिली.

जिल्हा परिषद व पंचायत समिती सार्वत्रिक निवडणूक – 2026 साठी सांगोला येथील पुण्यश्लोक राजमाता अहिल्यादेवी होळकर स्मृती भवन (टाऊन हॉल) व विद्यामंदिर प्रशाला,सांगोला या ठिकाणी मतदान केंद्राध्यक्ष व मतदान अधिकारी एक व दोन यांचे पहिले प्रशिक्षण काल शनिवारी पूर्ण करण्यात आले असून या प्रशिक्षणासाठी 1380 प्रशिक्षणार्थी अधिकारी व कर्मचारी यांचे आदेश प्रांताधिकारी तथा निवडणूक निर्णय अधिकारी बी.आर.माळी यांनी दिले होते.निवडणुकीच्या पार्श्वभूमीवर, निवडणूक प्रक्रिया ही पारदर्शक,शांततापूर्ण व नियमानुसार पार पडावी,यासाठी काल मतदान केंद्राध्यक्ष व मतदान अधिकारी यांचे प्रशिक्षण आयोजित करण्यात आले होते.

सांगोल्याच्या तहसीलदार तथा सहाय्यक निवडणूक निर्णय अधिकारी बाळूताई भागवत व समाधान वाघमोडे यांनी मतदान प्रक्रिया ईव्हीएम,व्हीव्हीपॅट हाताळणी,मतदार ओळख पडताळणी,आदर्श आचार संहिता,कायदा व सुव्यवस्था राखणे तसेच आपत्कालीन परिस्थितीत घ्यावयाची खबरदारी याबाबत मार्गदर्शन केले.यावेळी 32 झोनल अधिकारी उपस्थित होते.

तसेच विद्यामंदिर प्रशाला, सांगोला या ठिकाणी 14 वर्ग खोल्यामध्ये 14 झोनल ऑफिसर व मंडल अधिकारी हरिश्चंद्र जाधव आणि त्यांचे सहकारी यांचे सह हॅन्डसाॅन मशीनचे ट्रेनिंग देण्यात आले. यावेळी तलाठी,महसूल सेवक उपस्थित होते,असे मीडिया नोडल अधिकारी मिलिंद सावंत यांनी सांगितले.
    =================================

आगामी मतदान प्रक्रिया सुरळीत पार पडेल :

शनिवारी अर्ज माघारी घेण्याचा दुसरा दिवस असूनही सर्व उमेदवार तटस्थ राहिल्याने काल एकाही उमेदवाराने अर्ज मागे घेतला नाही. तसेच निवडणूक प्रक्रिया,निवडणूक प्रशिक्षण, क्लासरुम व हँडसॉन प्रशिक्षण पूर्ण झाले असून निवडणूक यंत्रणा सज्ज झाल्यामुळे आगामी मतदान प्रक्रिया सुरळीत पार पडेल,असा विश्वास आहे.
– तहसीलदार तथा सहाय्यक निवडणूक निर्णय अधिकारी बाळूताई भागवत.