मुसळधार पावसातही दीपकआबांच्या गांवभेट दौऱ्याला ग्रामस्थांचा उत्स्फुर्त प्रतिसाद

सांगोला :

                            राष्ट्रवादी काँग्रेसचे जिल्हाध्यक्ष तथा माजी आमदार दीपकआबा साळुंखे-पाटील यांच्या गांवभेट व जनसंवाद दौऱ्याला दिवसेंदिवस उत्स्फुर्त प्रतिसाद मिळत असून सांगोला तालुक्यातील वाकी-घेरडी येथे तर,मुसळधार पाऊस कोसळत असतानाही हजारो नागरिकांनी दीपकआबांच्या गांवभेट दौऱ्यास उपस्थिती दर्शवत दीपकआबांचे जंगी स्वागत केले.

पारंपरिक वाद्यांच्या गजरात वाजत-गाजत व फुलांची उधळण करुन राष्ट्रवादी काँग्रेसच्या कार्यकर्त्यांनी आणि अनेक महिलांनी औक्षण करुन आपल्या लाडक्या नेत्याचे,दीपकआबा साळुंखे-पाटील यांचे वाकी-घेरडी गांवात जंगी स्वागत केले.यावेळी वाकी-घेरडी गावातील सरपंच अर्चना शिंदे,विकास सेवा सोसायटीचे चेअरमन बाळासाहेब शिंदे,गणेश कांबळे, रफिक शेख,डॉ.पुण्यवंत निमग्रे,तुकाराम घेरडे यांच्यासह राष्ट्रवादी काँग्रेसचे पदाधिकारी व प्रमुख कार्यकर्ते उपस्थित होते.

रविवारी दुपारी ३ ते रात्री ८ वाजेपर्यंत दीपकआबा हे वाकी-घेरडी गांवच्या गांवभेट व जनसंवाद दौऱ्यावर होते.यासमयी,वाकी गावातील मारुती मंदिर, बुध्दविहार,शिंदेवस्ती,खांडेकरवस्ती,माळी-दाईगडे वस्ती,निमग्रेवाडी,दिवसे-पवार वस्ती या परिसरातील शेकडो नागरिकांशी त्यांनी संवाद साधला. यावेळी त्यांनी वाकी-घेरडी परिसरातील नागरिकांच्या रस्ते, पाणी,वीज व आरोग्य याविषयी अडचणी जाणून घेतल्या आणि तिथे जागेवरच संबंधित विभागाच्या अधिकारी व कर्मचाऱ्यांशी संपर्क करुन वाकी-घेरडी परिसरातील नागरिकांच्या अडचणी मार्गी लावण्याच्या सूचना केल्या.वाकी- घेरडी परिसरातील नागरिकांच्या अडचणी जागेवरच निपटारा केल्याने या परिसरातील नागरिकांमधून समाधान व्यक्त होत आहे.

————————————————————————

साळुंखे-पाटील परिवाराचे वाकी-घेरडी गांवावर विशेष लक्ष :

    सांगोला तालुक्यातील विकासाचे रोल मॉडेल म्हणून वाकी-घेरडी हे गांव ओळखले जाते.छोटे गाव असूनही परंपरेने साळुंखे-पाटील परिवाराने या गांवावर विशेष लक्ष दिले आहे.स्व.आमदार काकासाहेब साळुंखे-पाटील यांच्यानंतर स्व.शारदादेवी साळुंखे-पाटील व जिल्हा परिषद अध्यक्ष असताना जयमालाताई गायकवाड यांनीही आमच्या गांवावर विकास निधीचा पाऊस पाडला आणि दीपकआबांनी तर, आमच्या वाकी-घेरडी गावाला नेहमीच प्राधान्य देऊन आमचे प्रश्न मार्गी लावले आहेत.साळुंखे-पाटील परिवाराचे उपकार आम्ही वाकी-घेरडी गांवचे ग्रामस्थ कदापिही विसरणार नाही.
                                    – गणेश कांबळे (वाकी-घेरडी)
——————————————————————————