प्रलंबित तांत्रिक वेतनश्रेणीसाठी भूमी अभिलेखच्या कर्मचाऱ्यांचे काम बंद आंदोलन
सांगोला :
मागील अनेक वर्षांपासून प्रलंबित असलेला तांत्रिक वेतनश्रेणीचा प्रश्न सोडविण्यात राज्य सरकारकडून होत असलेल्या दिरंगाईच्या निषेधार्थ राज्य भूमी अभिलेख कर्मचारी संघटनेच्या पुणे विभागासह सोलापूर जिल्ह्यातील कर्मचाऱ्यांनी गुरुवार दि.१५ मे पासून बेमुदत काम बंद आंदोलन सुरु केले असल्याची माहिती संघटनेचे महेश होमकर व कडगंची भाऊसो यांनी दिली.
या संपाला भूमि अभिलेख राजपत्रित संघटनेच्या वतीनेही जाहीर पाठींबा देण्यात येत असल्याची माहिती संघटनेचे अनिल माने व शिवाजी भोसले यांनी दिली.तसेच या संपाला पाठींबा देण्याकरिता विदर्भ भूमी अभिलेख कर्मचारी संघटनेनेही पहिल्या टप्प्यात काळी फीत लावून शासकीय कामे करत सरकारच्या वेळकाढू धोरणाचा निषेध करण्याचा निर्णय घेतला असून आंदोलनाची दखल न घेतल्यास ही संघटनाही बेमुदत संपात सहभागी होणार आहे.
भूमी अभिलेख विभागातील कर्मचाऱ्यांना तांत्रिक वेतन श्रेणी देण्यासाठी तत्कालीन जमाबंदी आयुक्त एन.के.सुधांशू यांच्या अध्यक्षतेखालील समितीचा अहवाल वर्षभरापूर्वी सरकारकडे देण्यात आला आहे. परंतु,अद्याप त्यावर कोणताही निर्णय घेतलेला नाही. त्यामुळे राज्यभरातील कर्मचाऱ्यांमध्ये वेतनश्रेणीच्या प्रश्नावरुन तीव्र असंतोष आहे.या कर्मचाऱ्यांच्या सेवा भरती नियमात सरकारने २०१२ मध्ये दुरुस्ती करुन सर्व पदांसाठी तांत्रिक अर्हता निश्चित केली आणि वेतन मात्र,कारकून संवर्गातील दिला जात असल्यामुळेही कर्मचाऱ्यांमध्ये असंतोष आहे.
सध्या,स्वामित्व योजने अंतर्गत राज्यातील सुमारे ४० हजार गावांचे ड्रोन सर्वेक्षण सुरु आहे.पण,यासाठी सरकारने अतिरिक्त कर्मचारी भरती केलेली नसून,या आस्थापनेवरील सुमारे २ हजार कर्मचाऱ्यांची पदे रिक्त आहेत,अशाही परिस्थितीत कर्मचारी वर्ग काम करत आहेत. तसेच राजपत्रित वर्ग २ च्या अधिकाऱ्यांच्या पदोन्नतीची फाईल मंत्रालयात गेल्या वर्षभरापासून प्रलंबित असल्यामुळे गट ब मधील राजपत्रित वर्ग २ च्या अधिकाऱ्यांची अनेक पदे रिक्त आहेत.संपूर्ण यंत्रणा ही अतिरिक्त प्रभारामुळे मेटाकुटीस आली आहे.त्यामुळे या खात्यामध्ये मोठा असंतोष आहे. त्यामुळेच कर्मचाऱ्यांनी हे आंदोलनाचे हत्यार उपसले असल्याचे सांगण्यात आले.
——————————————————————————
