सांगोला रोटरी क्लब आयोजित “मराठी पाऊल पडते पुढे” कार्यक्रमास उत्स्फूर्त प्रतिसाद

सांगोला :

      मधूर आवाजाचे गायक,गायिका,अद्यावत वाद्यवृंद, पारंपरिक व नाविन्यपूर्ण वेशभूषा,सुंदर सादरीकरण, आकर्षक स्टेज,नेत्रदीपक प्रकाशयोजना व ताज्या दमाचे कलाकार त्यामुळे “मराठी पाऊल पडते पुढे” या सांगोला रोटरी क्लबने आयोजित केलेल्या सांस्कृतीक कार्यक्रमास सांगोला शहर व तालुक्यातील नागरिकांनी
उत्स्फूर्त प्रतिसाद दिला.

सामाजिक कार्यात सतत अग्रेसर असलेल्या सांगोला रोटरी क्लबच्या वतीने समाजकार्यास आवश्यक असणार्‍या निधी संकलनासाठी सांगोला येथील राजमाता अहिल्यादेवी होळकर (टाऊन हाॅल) सभागृहात उदय साटम व ज्योती साटम निर्मित आणि दिग्दर्शित महाराष्ट्राच्या महान संस्कृतीचा महाकलाविष्कार असलेल्या “मराठी पाऊल पडते पुढे” या बहारदार व सांस्कृतीक कार्यक्रमाचे बुधवारी रात्री आयोजन करण्यात आले होते.

                  “मराठी पाऊल पडते पुढे” च्या माध्यमातून महाराष्ट्रातील मराठी संस्कृती,परंपरा,चालीरिती,देवधर्म,
हिंदु परंपरा यावर आधारित गाणी, नृत्य व लोकगीते अगदी सुंदर पध्दतीने सादर करण्यात आली.ग्रामीण भागातील जीवन,पहाटगाणी,वासुदेव गीत,देवीचा जोगवा,वाघ्या मुरळी गीत व बहारदार लावणीच्या सादरीकरणामुळे प्रेक्षक मंत्रमुग्ध झाले होते. तसेच छत्रपती शिवाजी महाराजांच्या जीवनावर आधारित पोवाडा व महाराष्ट्र गीताचे सादरीकरण आणि गायन खूपच प्रभावशाली होते. ‘जयोस्तुते’ या स्वातंत्र्यगीताने कार्यक्रमाची सांगता करण्यात आली.

                     “मराठी पाऊल पडते पुढे” च्या निमीत्ताने सांगोलकर नागरिकांना एक चांगला व मराठी संस्कृती जोपासणारा कार्यक्रम पाहण्याची संधी रोटरी क्लबने उपलब्ध करुन दिल्याबद्दल रोटरीचे आभार मानत यापुढे प्रत्येक वर्षी असे कार्यक्रम आयोजित करावेत, अशी ईच्छा कांही नागरिकांनी रोटरीचे अध्यक्ष डाॅ. साजिकराव पाटील व माजी अध्यक्ष दीपकराव चोथे यांच्याकडे व्यक्त केली.सदर कार्यक्रमासाठी अकलूज व पंढरपूर रोटरी क्लबच्या सदस्यांचीही उपस्थिती दिसून आली.

———————————————————————————

रोटरी क्लबच्या संस्थापक सदस्यांचाही झाला सत्कार :

“मराठी पाऊल पडते पुढे” या कार्यक्रमाच्या निमित्ताने सांगोला येथे रोटरी क्लब सुरु करणाऱ्या व विविध सामाजिक कार्याच्या माध्यमातून नांवारुपाला आणणार्‍या रो.के.एस.माळी (सी.ए.),रो.डॉ.प्रभाकर माळी,रो.दीपकराव चोथे,रो.सुरेश (आप्पा) माळी, रो.डॉ.मच्छिंद्र सोनलकर,रो.गोविंददादा माळी इ.सर्व संस्थापक सदस्यांचा रोटरीचे अध्यक्ष डाॅ.साजिकराव पाटील यांनी चांदीचे नाणे देऊन सत्कार केला.
———————————————————————————