अपघातात मृत पावलेल्या सोलापूर येथील युवकांच्या कुटुंबियांना प्रत्येकी ५ लाखांची मदत

मुंबई :

तिरुपती येथे दर्शनासाठी गेलेल्या सोलापूर येथील भाविकांच्या वाहनाला बुधवारी अपघात झाल्याने त्यात सोलापूर येथील ५ तरुणांचा मृत्यू झाला आणि ४ जण जखमी झाले. या दुर्घटनेबाबत मुख्यमंत्री एकनाथ शिंदे यांनी दु:ख व्यक्त केले असून मृतांच्या कुटुंबियांप्रती सहवेदना व्यक्त केल्या आहेत आणि या अपघातात मृत्यू झालेल्यांच्या कुटुंबियांना प्रत्येकी ५ लाख रुपये मदत देण्याची घोषणा मुख्यमंत्र्यांनी केली आहे तर,जखमींवर शासकीय खर्चाने उपचार करण्याचे निर्देशही मुख्यमंत्र्यांनी दिले आहेत.

सोलापूर येथून तिरुपती येथे दर्शनासाठी गेलेल्या तरुणांच्या वाहनाला काल तिरुपतीजवळ अपघात झाला. त्यातील ५ जणांचा जागीच मृत्यू झाला असून ४ जण गंभीर जखमी झाले असल्याने त्यांच्यावर तिरुपती देवस्थानच्या रुग्णालयात उपचार सुरु आहेत.या दुर्घटनेची माहिती मिळताच मुख्यमंत्री एकनाथ शिंदे यांनी जखमींच्या उपचाराबाबत सोलापूर प्रशासनाला निर्देश दिले असून मृतांच्या कुटुंबियांना तातडीने प्रत्येकी ५ लाख रुपये देण्याचे निर्देशही त्यांनी दिले आहेत.
—————————————————————————